![\"\"](\"https:\/\/www.vorarlberger-walservereinigung.at\/vwvwp\/wp-content\/uploads\/2015\/07\/bieliane.jpg\")
<\/a>langsam abr gwii\u00df siat ma mrs a, wia lang i scho da schtand muusallei am schtraa\u00dfarand, bi ra alta akazie ommanand. miin sitz us blau wii\u00df gschtraiftm schtoff laad scho f\u00e4\u00e4dra, fransed d\u00f6tt ond da us, miine holzbei send eigetle no guat benand, abr miine roschtiga schruuffa am scharniir, zom mi uuf- ond zuaklappa, dia h\u00e4nd scho lang n\u00f6mma dia schpannig, wo sch ka h\u00e4nd, wo n i no bluatjong ond niglnagln\u00fc\u00fc vorm niglnagln\u00fc\u00fca h\u00fc\u00fcsle mit dem niglnagln\u00fc\u00fca f\u00e4nschtr gsee bi. jetz hed ma mi scho dia lengscht ziit n\u00f6mma bruucha wella, abgschtelld hed ma mi, n\u00e4mma a da schtraa\u00df im nirgendwo z griichaland. daag ond nacht knattered d mopeds, ruusched d auto ond s\u00f6ttig gro\u00dfe, gruusig luute, schtiichige laschtw\u00e4\u00e4ga d\u00fcr, wo n i jedsmal dia gr\u00f6\u00f6scht m\u00fca haa, dass i vom luftschtoo\u00df ned mit eim klepf omfall ond da rescht vo miinera l\u00e4nkwiiliga ziit i da bruatshitz d\u00f6tt flakk schtatt schtand ond d\u00e4nn keis gf\u00e4\u00e4rt, nei, grad gar n\u00fc\u00fcd me see ka vo d\u00f6tt donna.<\/p>\n<\/p>\n
uf eismal sia n i keis knattrigs moped, keis auto, kein f\u00fcrchtiga laschtwaaga koo. abr ganz d\u00fc\u00fctle zwei reedr mit mords pakkt\u00e4scha hendrthalb druuf. an gro\u00dfa maa ufm rad, d\u00e4 im takt allig nechr konnt ond drzua kh\u00f6\u00f6rig schnuufet. wo n r uf miina h\u00f6he isch, luaget r mi aa, h\u00f6rt uuf tappa, schtigt ab, lained schis schwere rad a dia gro\u00dfe duuchlgr\u00fcane akazie hendr mir ond konnt dia paar schritt omma. hoofele hokkt r uf mi druuf. uuuuh. puh. des \u2013 gaid \u2013 grad \u2013 no. i ha doch scho viiil z lang n\u00f6mma g\u00fcabt! grad sch\u00f6 is. d\u00e4 maa hokket uf mr druuf, knabbred an a paar k\u00fcrbiskern ommanand, ond i heb n guat \u2013 wer hett des daicht? i ned! ganz schtolz bin i uf mi s\u00e4lb.<\/p>\n
guat gaid s \u00f6nsch so mitanand!<\/p>\n
ond d\u00e4nn w\u00fcrd s mr viil z weile wiidr liicht. was isch d\u00e4nn jetz? uufgschtanda ischd r, ond i h\u00f6r, wia nr said: \u201eKomm, weile, wiible, luag! i ha an schtual f\u00fcr di! hokk di hee! kasch di wondrbar uusruaba!\u201c aha! siis wiib ischd aakoo, au mim rad. er nemmt s era ab, f\u00fc\u00fcrt s zom bomm ond schi hokket sche vrschwitzt uf mi druuf. \u201eDes isch an s\u00f6rvis!\u201c, saitsch ganz zfriida. \u201emai, isch des gm\u00fcatle!\u201c ond frait sche. die zwee schw\u00e4tzed mitanand, ruabd sche as wiile uus ond mache d\u00e4nn uus, dasch jetz wiitr w\u00e4nd. s gwicht uf mir gaid w\u00e4kk ond mir f\u00fcrcht s fascht vorm pf\u00fcadi s\u00e4\u00e4ga.<\/p>\n
abr was passiirt? uf eimal m\u00e4rk i wia dr maa mi uufl\u00fcpft ond hoofele zs\u00e4\u00e4maklappt! miine alta, roschtiga scharniir quiitsched ond krached. sapperlott, au! heieiei! was tuat r d\u00e4nn? dr maa schpannt mi mit am radgommi z oberschddruuf uf schiin gro\u00dfa scheppsa pakk, schtiigt omscht\u00e4ndle uf s rad ond tappt i schiiine g\u00f6\u00f6lta tr\u00e4ttar. dr luft schtraift mr om miine alta holzbei, miine blauwii\u00dfa fransa flattared ganz n\u00e4rsch, as romplet ond rasslet ond wagglet. juchhee!
\n\u00f6nsche reis gaid los. wuchalang bin i drbii. n\u00fc\u00fcd mee gaid oone mi: bi jedr pause schnallt r mi aacha, klappt mi uuf ond lad schis liabe wiible ee zom uf mir h\u00f6kkla.<\/p>\n
so a fraid!<\/p>\n